好耐未UPDATE過，因為有D忙(自己野)、有D病、有D平常心(對公司野)......今日見有D得閒，加上有D野冇辦法唔講俾大家聽(公司)，因為實在覺得太攪笑......

九月尾十月頭0個段時間，唔知仲乜，個人好唔舒服，一到夜晚咳得好勁，咳到想訓都訓唔到，每日返到公司一聽到佢地講野，個頭就痛到爆，再加埋一個笑面虎既同事，根本唔想出聲，見到同聽到佢把假到想死既笑聲實在令人覺得討厭，好耐未試過咁討厭一個人，不過大家都知咩事，自從佢篤完我地再加上做左M既所謂上司，再冇以前咁死都跟住JM、M同我一齊食飯，我地依家有時會帶飯，一個禮拜總有一兩日唔同我地食既，不過就算一齊食，我地都會極速食完就走，亦冇以前咁柴娃娃。

十月份，公司已經進入一個極度淡季既年代，一日只有兩三張單，不過我都已經忙左年幾，幾本上冇停過，之前本身我每日下晝都係執返之前旺季冇時間做既野，依家野又執完，可能有D人眼紅見我地冇野做，就向MK提出，將D廢紙拎去賣，問左價之後，暫時既海鮮價係HK$0.60/1KG，到依家變到除左廢紙之外，連一D由”V老篤”退返黎既貨都要拎去賣，咁多年都係叫運輸車去堆填區掉左去，今年係要拎去賣，再跟住要將D舊電子板、舊電子零件...拎去賣，都唔緊要，橫掂都冇野做，仲要將電子上面有既供應商嘜頭整走、要每包或者每盒拆出黎(因為賣出去既價錢高D)，將每樣野分門別類咁，即係黃鋁罐、啡膠樽咁分開，都唔緊要，最慘係我地D手，俾D電子整到損晒，0岩0岩呢個禮拜，我地一行四個人(AL、JM、C同我)基本上每日都0係度好似工廠既女工咁整，整到我都忍唔住成日0係度笑，我覺得真係有D攪笑、有D老土同有D折墮，有咁耐風流就...因為成日都整到手，我同AL就戴住一對綠色既菊花牌手套，C同JM就戴住女工用黎開工既手指頭套，我隔離就放左一個磅，每做到咁上下，我同AL就拎去磅，拆左出黎既電子問過價知道係HK$40/1KG，通常一個下晝只係整到二十蚊咁上下，一到二十蚊我就頂唔順話我唔掂要收工，因為真係好攰，個鼻索到D灰又辛苦，總之好慘，最攪野係我地四個一齊整，就算唔計我地人工，我地用左三十五蚊買左兩包手指套、兩對菊花牌手套、暫時用爛一把”教剪”、換左幾塊刀片、用左好多個垃圾袋......仲未計受傷用既膠布、JM同我鼻敏感既藥、鼻敏感用既廁紙、洗手既洗手液、因為太辛苦既關係，我地都不停食同飲公司既野......大概每人每日幫公司賺到二十蚊，四個人一佰，扣除以上開支，呢單生意唔止冇錢賺，仲係蝕錢，以我個人覺得，不如0係第二D野度扣好過，例如文具、清潔用品唔好用咁貴之類，不過，諗諗下，公司根本唔係志在呢幾十蚊，只係有D人唔想我地太得閒，但係又有咩辦法呢，真係冇生意嘛!!!笑生-AC成日向MK提議我地要做電子以外既野，本身佢要做既野就成日點晒我地做，最慘係M，根本個客唔係佢既，依家因為UNDER住笑生，所以連笑生既客基本上都要照顧埋，真係令人火滾!!