2009年既新年，同往年唔同，因為今年過年前冇野做，唔駛話等放假先算係真正過年，之前已經準備好晒所有野同心情，返澳門過年，我鍾意0係澳門過年多過香港，因為感覺香港冇野玩，返過去都係除左食同賭之外，都仲可以有好多野玩，呢D唔講咁多喇，大家見到面先講啦......

過完個年，唔知係唔係玩得太多，就病左，即刻返黎，咁0岩發緊燒我仲訓緊覺0個日既朝早(2月2號(一)初八)就收到電話，係上次我話想做0個份工，話我台灣0個便PASS埋，叫我聽日返工，問我得唔得，我想話可唔可以過兩日先，但冇理由啦，所以話好，下晝即刻去睇醫生，收到呢間野個電話，話SEND左份合約俾我睇，佢地話因為第一次請HK人，好多HK法例都唔知，叫我睇下再叫佢地加返，吓，我覺得好奇怪囉，你地俾份約我簽叫我睇返有D咩要加，可唔可以加一行話個個月加人工呢?返去我又真係睇喎，打返俾佢話正常應該點樣，0係電話裡面已經講緊呢一年我應該要負責D乜野，佢知我病問我聽日係唔係返到，如果係佢就叫個同事聽日0係台灣飛過黎TRAINING我，嘩!好似好恐怖咁。

2月3號(二)踏入2009年第一日正式返工，首先當然了解下呢間公司，總公司0係台灣，有一間分公司0係韓國，0岩0岩香港係第二間分公司，好似幫手做開荒牛一樣，今日我HK既老細-K大概教左我做野，因為台灣同事-A班機DELAY左，所以成四、五點先黎到，又教左D，主要都係SHIPPING既野。

2月4號(三)第二日返工，今日就慘喇，因為A只有三日TRAINING我，今日又多單，又多野發生，先發覺以前自己所謂做或者學既SHIPPING野，只係屬於皮毛野，真正既對我呢個冇記憶力同唔清醒既人黎講，令我個人好混亂，加上唔舒服，都幾辛苦，但自己又想學到野，冇辦法，因為台灣有好多野唔同香港，我要每一樣跟足佢地規定既方式去做，佢地會好有規劃咁去做每一樣野，每一樣野都要清清楚楚，以前做既兩間公司可以話乜都係求其就算，依家我要重新再學呢樣野，對我黎講都幾好，加上佢地都係講國語，有時本來明既野，突然有一、兩個字聽唔明佢地講乜，自己又開始亂晒，之後又要重頭組織返晒D野。

夜晚突然胃抽筋，好慘，我個人實在太緊張喇!要放鬆、吸氣、放鬆....

2月5號(四)第三日返工，今日好D喇，因為尋晚返去諗得明晒D野，今日開始學”三角貿易”呢個題目真係唔掂，個人完全唔清醒，之前我聽佢地講仲聽錯唔知乜野三腳貓，諗返都攪笑，因為公司想裝修，下晝我就同A一齊畫圖研究點樣裝修，又出去睇傢俱，”三角貿易”已經飛左唔知去邊喇!!

好耐冇上過FACE BOOK，今日上左去，居然俾我發現一樣野，之前公司其中一個同事係同我同一間學校畢業，諗返都幾攪野，0係I-L做左兩年幾，識左呢條友又兩年幾，大家都唔知，到我走後先無意中發現，你話呢個世界幾咁細呢!! 今日頂唔順再睇多次醫生，都係未好，食完藥成個人成日好似坐0係隻船咁，浮下浮下......

2月6號(五)第四日返工，今日到我老細-K病左，唔知係唔係我D菌強得濟，真係唔好意思，K三點幾返黎，五點幾走左，好在A 0係度，如果唔係真係唔知點算，繼續學我需要學既野，繼續0係隻船度浮下浮下，因為A要整K既野，好忙，帶唔到我做野，我只有自己試做，好驚險，A今日要走喇，臨尾A出返個E-MAIL俾公司所有人報告返TRAINING我既情況，一開頭話感謝我抱病學習...之後講我依家大概可以做D乜野...到最後加多句畢竟我只學習了三日，希望大家對我呢個新人多多照顧之類...佢SEND左出去之後，好多同事SEND返黎(包括台灣大老細)叫我加油之類，呢一刻覺得都幾感動，之前我要SEND個E-MAIL出去介紹我自己時亦收到好多回覆叫我加油，我覺得香港人只會諗你死你既事啦，而台灣人真係唔同架，所以我覺得我等呢份工係正確架!!呢幾日亦覺得真係過得好充實。收工後，我同A一齊搭車，佢去機場，臨尾都話加油!!我知你得既...多謝晒，我都會加油，亦希望我真係得既...